2020-12-10 – URRIKO DEI ASPALDIKOA: BELATE-BERUETE IBILALDIA

Iragarritakoa: euria zar-zar 7:00etan Iratxoko atean elkartutakoan. Atean, elkartea itxita baitago pandemiaren ondorioz. Eguraldia ikusita, bik ohatzean gelditzea erabaki dutela jakinarazi dute. Zentzudun bakarrak? Gainontzeko zortziak abiatzeko prest, zer datorren jakitun. Nola egin atzera?

Taxia martxan jarri orduko atertu egin du. “Belaten ez da horrela egongo”. Jose taxi-gidariak deitzen badiogu Orokietako gainera, Gorostietara, atera daitekeela bota du.   Koberturarik ez bada, ordea? Kotxez egindako bide osoan ia tantarik ez. Sinestezina. Venta Quemadan dena ilun7:30ak pasa izan arren. Ateri. Ehiztari bakarrik ere ez. Harritzekoa.

Alanbre-hesia ia ilunpean gainditu dugu sasiei muturra kolpeka atzera eraginez. Lehenengo larreetan, uretan plista-plasta, errekatxoa hazita. Ezkerraldetik, bi tiro, bide luzean entzun ohi  dugun kontzertuaren lehenengo bi notak. Gezurra dirudien arren bide luzean ez dugu gehiago adituko. “Ehiztariak bukatzen ari ote?”.

Eta ateri.  “Ez da gutxi euririk gabe abiatzea”. Bidexkak sasiak erdi hartuta ditu. Laharrak eta iratzea nagusi, ardi eta behor dezente ibili arren. Pistara heldu gara, azkenik, eta Putzuetako gainera bidean (1063m) haize hotz indartsuak ederki astintzen du Dorisek motxilari lotuta daraman ikurrin beltza. Eskerrak euririk ez den. Zabor poltsa horrengatik motxilak jai zeukan. Benetako babesle bat oparitu beharko. Beheko txokoan, askotan topatu izan dugun artzaina. Artaldea saroian bildua du. “Ateri eginen du”, animatu gaitu. Artzainek aztatzen dute, asmatzen dute. Nola? Maximok Leringo artzain baten hitzak gogoratu ditu: “Gaur euria izanen da txoriak edatera ibaira jaitsi direlako”.

Bokata jaten ohiko pago galanten ondoan gozatu dugu, gehienek zutik esertzeko lehorrik ez delako. Oso gertu, azkeneko urteetan lehor aurkitu izan dugun iturburuari ura bor-bor dario errekatxoa sortuz. Oinak gehiago ez bustitzeko zerbait desbideratu behar.

Bidean aurkitzen ditugun usategi eta txaboletan ia inor ez. “Gaur ez dira postuetara igo ere eginen”. Eltzaburu eta Saldiasko bi gazte amoranteen istorio tragikoaren berri eman diogu Maximori gurutzearen ondoan. Bertsio guztiak ez dira bat etorri, baina…

Euria hasi du lehenengoz eta euritakoak eta kapusaiak atera behar izan ditugu. Leurtzako urtegi aldera, lainoa nagusi. Hurrengo batean beharko. Dorisen lagun leitzarren txabola, hutsik. Gorostietara daraman pistara ailegatu aurretik atertu egin du. Pista utzi eta Otedegi gainerantz jo dugu zortzi ibiltariok, baten bat damutu arren. Jaitsieran, pastak eta kafe beroa gogoan, “Manolo” oihu egin du norbaitek. Alferrik. Gorostietako merenderoan jarri dituzten mahi eta aulkiak motxilan generamatzanak janez mustu ditugu. Zutik eta distantziak gordez: lau mahi baten inguruan, beste lau ondokoaren alboan. Datorren urtean eseriko  omen gara Iratxok jartzen dituen pastak jan eta kafea hartzera. Ea egia den.

Ordu pare bat Berueteraino. Bizpahiru aldapatxo, azkenekoa luze xamarra. Aurretik mendi hegi aldapatsua zeharkatu behar da. Bidea errekasto bihurtua, ura goitik behera, nonahitik. Azkeneko aldapa serioa igotzean, mila metrora, gorringo faltsu eder batek (Amanita muscaria) geldialditxoa egiteko aitzakia eskaini digu eta gure argazkilari artistek aukera ederki aprobetxatu dute onddoa bera eta taldea hilezkortzeko.

Hemendik aurrera bidea erraza da;  ia ez dago aldaparik. Hala ere, Otsola erreka hazia dator eta batzuek lanak izan dituzte uretan sartu gabe gurutzatzeko. Arraratsera bidean ur jauzi zaratatsuak eskaintzen dizkigu, opari, aurreko urteetan hain apal eta isil azaldu zaigun errekastoak.  Beruetera ura daraman bidearen ondoko pago ederrenak botatzeko markatuak daude. Botatzea ez dago gaizki nahiz pena eman. Baina nola egongo ote da bidea datorren urtean? Alternatibaren bat bilatu beharko.

Gaztainak hartzeko asmoa zuen gutariko batek Beruetera iritsi aurretik, baina prest zuen poltsa beste batean erabili beharko du. Ez gaztainarik, ez onddorik… Hala ere, zortziak pozik espero ez genuen eguraldia izan dugulako.

Taxira sartu aurretik, euria. “Orain egin dezala, nahi badu”.

ARGAZKIAK:

http://www.iratxoelkartea.com/multimedia/fotos/montana/?preview_id=82&preview_nonce=dd364bfca8&_thumbnail_id=-1&preview=true

Oskar

Oskar galdu dugu eta triste gaude. Oso atsekabetuta. Berak, ordea, ez liguke alaitu arte bakean utziko eta, argazkietan bezala, irribarretsu, topa egiten bukatuko genuke. Zegoen tokian zegoela, bizipoza kutsatzen zuen, alaitasuna, indarra, baikortasuna…
Ez zen Iratxo Mendi Taldekoa izan, baina izan balitz bezala. Momentu eta lan asko partekatu genuen elkarrekin. Gutxiegi! Guraso bezala Sakanako Ibilaldiaren antolaketan, Oskar izan zen Ibilaldi Txikiaren bultzatzaileetako bat.
Edonoiz eta edozertarako beti prest. Ezetza ez zen bere hiztegian sartzen. Eskatzen geniona eskatu: “Sí, hombre”. Motozerra eta sasi-garbitzeko makina hartuta bideak garbitzen aritzen zen, banderatxoak ekarri eta markaketan Iperekin batera. Ibilaldiaren egunean berean ere, goizeko 4:30etarako, hartutako ardura txintxo beteko zuen. A, hori bai: 7:30etako arrautza frijitu parea eta urdaiazpikoa gozatu egiten zituen Oskarrek eta zer nolako giroa sortzen zuen bere inguruan. Lagun-artea zen berea. Barre-algara ereiten zuen.


Urte zahar egunean, txintxo etorriko zen zortzietarako bere traktorea hartuta, Zato txakurra lagun, Iratxon txistorrak, urdaia, ardo eta sagardoak eta gainerako guztiak kargatu eta Trinitatera igotzeko. Orain hiru urte, bera ospitalean larri zela, Ipe, anaia, bidali zuen egun horretan hutsik ez egiteko. Egurretan ere urtero aritzen ginen Trinitaterako udazken aldera. Oskarrekin gustura joan zitekeen nora nahi.
Mila esker, Oskar, oparitu zenizkigun ordu guztiengatik. Zuretzat karroza hutsak ginen, baina edozeinekin moldatzen zinen; gaztetu egiten gintuzun.
Lanak zure hutsunea betetzen! Baina oroitzapenak ez dizkigute ebatsiko.
Ikusi arte, Oskar.

25eko IBILALDI BIRTUALA

Kaixo, mendizale hori:
Gaur 25 da, bai, gure Sakanako Ibilaldiaren larunbata eta, garai honetan, abian izan beharko genuke, irteerako urduritasun ohikoarekin, Pabloren suziriaren zain S. Donato, S. Miguel, Trinitatea eta Itxasperriko Santiago baselizetarantz joateko; nahiz igarotzen ditugun beste gune esanguratsu batzuetarantz: Euskal Herriko Erdigunea, Agiri herri hila, Larrazpileko trikuharria; edo deika ariko zaizkigun tontorrak nahiz, urtero bezala, zain izango genituzkeen inguru hauetako herriak.
Errealitatea bestelakoa da, ordea: etxean egotea behartzen gaituen zientzia-fikziozko film bateko egoera guztiz surrealista ari gara bizitzen. Hainbat eta hainbat bizi aurrean hartuta eraman dituen Covid-19aren uholdeak gure bizitzaren zati bat “ebatsi” digu: gure mendiez gozatu ahal izatea, geure Ibilaldiaz; baina ezin digu “lapurtu” ez irudimena ezta maite dugunaz gozatzeko ilusioa . Hortaz, Ibilaldia birtualki egitea proposatzen dizugu eskaintzen dizkizugun esteka batzuen bidez. Hasteko, XXX. Sakanako Ibilaldiaren urteurrenaren bideoa (20 minutu irudi ikusgarriz josiak)ikusiz egin dezakezu ibilbidea: https://youtu.be/SudoJIcy3-E
Edo, denboraz larri bazabiltza, 2017 beste bideo laburrago honetara jo dezakezu: https://youtu.be/2hnI3AZVZcw
ETBko Gailurra Martxan saioak egindako erreportajea ere ikus dezakezu hurrengo estekan: https://youtu.be/4wTZNvYY64Y
Edo Iratxo Elkarteko web orrian argazki mordo bat ikusi: http://www.iratxoelkartea.com/multimedia/fotos/sakanako-ibilaldia/
Imajinazioa erabili eta, ariketa egiten ari zarela nahiz balkoian edo sofan eserita, amets egin, irudikatu lagunekin ibilian zabiltzala Ibilaldiak zeharkatzen dituen tokietan barrena: Andia, Aralar, Larrazpil, Erga… Aprobetxatu kontroletatik edo hornidura puntuetatik igarotzean indarrak berreskuratzeko eta azken urteetan zehar ezagutu dituzun boluntarioak agurtzeko. Eta eguna merezi duen bezala amaitzeko, gozatu enparantzan txixtorra pintxoak eta sagardo fresko goxoa ibilaldiaren gorabeherak komentatzen eta goratzen dituzuela: ibilaldia bukatzeagatiko poztasuna edo halako urtetan bukatu ezin izan zenuela… dena delakoagatik.
Laburtuz, utzi irudimenari hegan egiten eta pentsatu 2021ean berriro gogo gehiagoz ikusiko dugula elkar.
Gora gu eta Sakanako Ibilaldia!!!

XXXI. SAKANAKO IBILALDIA BERTAN BEHERA

Gizarteak bizi duen Covid-19 pandemia dela eta, osasun-agintarien gomendioei jarraituz eta mendizaleen, zein laguntzaile, antolatzaile nahiz herritar guztien osasuna lehenetsiz, Irurtzungo Iratxo Elkarteak apirilaren 25en egitekoa zen XXXI. Sakanako Ibilaldia bertan behera uztea erabaki du. Beraz, aurten ez da egingo Ibilaldia ez ezarritako datan ezta beste batean ere.
Hori bai; 2021eko apirilaren azken astean berriro gurekin izango da XXXI. SAKANAKO IBILALDIA.
Lerro hauen bidez, gainera, aurten zein aurreko urteetan ibilaldi hau ahlbidetu duten, erakunde, komunikabide, enpresa, mendizale eta laguntzaile eta boluntario guztiei Iratxo Elkartearen esker ona adierazi nahi diegu. Eskarrik asko.
Eta nola ez, 2021en indar gehiagorekin ekingo diogu lanari!

XXXI. SAKANAKO IBILALDIA, ALDI BATERAKO ETENDA

Gure artean hedatu dugun Covid-19 pandemia dela eta, gizartea bere bizi-ohiturak erabat aldatu beharrean aurkitu da eta mendizaleok osatzen dugun taldetxoak ere egoerara moldatu beharko dugu.

Euskal Mendizale Federazioak (EFM) Iraupen Luzeko Ibilaldiaren Batzordearen bidez eta Zirkuituak “hurrengo asteetan egingo diren martxak aldi baterako etetea gomendatzen diete elkarteei.” Eta gehitzen du: “Egoera normalizatzen denean , Ibilbide Luzeko Martxen Egutegiarekin eta Shebe Peña 2020 Sariarekin zer egin aztertuko da.”

Iratxo Mendi Taldean aldez aurretik zalantzan bagenituen XXXI. SAKANAKO IBILALDIArekin, gomendio horrek ondorengoa erabakitzera eraman gaitu:

1.- Internetez martxoaren 15etik aurrera egin zitezkeen izen-emateak apirilaren 15etik aurrera egin ahalko dira, hasiera batean, egoerak besterik agintzen ez badu behintzat.
2.- Iratxo Mendi Taldeak XXXI. SAKANAKO IBILALDIARrekin zer egin erabakitzeko egoeraren bilakaera izango du kontuan. Beraz, Euskal Mendizale Federazioak eta Zirkuituak zer erabaki / gomendatu / agintzen duten itxarongo du.
3.- Erabakitzen dena erabaki, berehala jakinaren gainean jarriko zaitugu, mendizale laguna.

GORA SAKANAKO IBILALDIA!!!