ZORIONAK

Mendizale laguna:
Urtea amaitzera doakigu, Olentzero bidean da guztiontzat opariz josita eta guk ere, Iratxo Mendi Taldetik, geure erregalua eskaini nahi dizugu gogoan zaitugula ahaztu ez dezazun. Horrexegatik, Xabi Unanuarekin Sakanako Ibilaldiaz egin genuen bideoaz gozatzeko aukera ematen dizugu oraingoan. Ea gustatzen zaizun. Horretarako, klikatu ondorengo estekan: https://youtu.be/SudoJIcy3-E
Gainera, zurekin egoteko aukera hau probestuz, nola ez, 2020 urte ezin hobea opa dizugu. Bizitzak, orokorrean, eta mendiak, bereziki, momentu zoriontsu eta alaiak eskain diezazkizula.
Guk geure aldetik, abenduaren 31n 2019ari, Trinitatean, lagun artean agur egin ondoren (ez dago pintxo bat jatera gonbidatuta zaudela esan beharrik) , 2020ko Sakanako Ibilaldia prestatzen hasiko gara, buru belarri. Apirilaren 25a ziztu bizian gainean izango baitugu.
Urte berri on! mendizale laguna eta XXXI. Sakanako Ibilaldira gonbidatuta zaude. Ikusi arte!

ESKER ONA ETA ZERBAIT GEHIAGO

Mila esker, bihotz bihotzez, XXX. Sakanako Ibilaldian gurekin izan zineten guztioi baita izena eman eta etortzerik izan ez zenuten mendizale haur, gazte et eta heldu guztioi. Eskerrik beroenak Iratxo Mendi Talde xume hau osatzen dugunon partetik eta, aurretik, egunean bertan eta ondoren, gurekin lanean aritu ziren kolaboratzaile guztien partetik.
Pello Alzuetaren galera sufritu genuenean, gure Presidenteari omenaldi bat egitea erabaki genuen Sakanako Ibilaldia aurten ere antolatuz eta, “Pello gogoan”, horretan saiatu gara geure gaitasun eta ahalmen guztiak bilduz. Eta ahaleginak merezi izan du eta nola! Izan ere, aurtengoa izugarria izan da, espero ezin genuena. Horregatik, berriz ere, eskerrak bihotzez.
Marka guztiak hautsi ditu XXX. Sakanako Ibilaldiak: 1418 izan zarete Ibilbide Luzean, Motzean nahiz Txikian parte hartzeko izena eman duzuenak. Apirilaren 27an ere 300 lagun baino gehiago inskribatu zineten kamiseta ez zenutela ziurtatua abisatu arren. Iratxo Mendi Taldearekin bat egiteko asmoa erakutsi zeniguten eta geuk ere antolakuntza mailan gauza gehienak txukun egiten ditugula adierazi. Arrakastak erronka berriei erantzuteko/aurre egiteko berriz ere indarrak bildu beharko ditugula erakusten digu eta hala eginen dugu: eutsi.
Hala ere, XXX.ean gauza guztiak ez ziren antolatzaileok nahi bezala joan eta akatsak onartu beharrean gara. Izan ere, Madotzeko kontrolean Ibilaldi Motzeko zuetariko mendizale askok itxaron behar izan zenutena akats handia da. Horregatik, bihotzez, gertatutakoa sentitzen dugula adierazten dizuegu eta barkamena eskatu eta horrelakorik errepika ez dadin konpromisoa hartu. Mila esker egoera hain patxadatsu hartu izanagatik. Oso gutxi izan zarete ibilaldiaren amaieran kexatu izan zaretenak eta, egia aitortzekotan, ez zitzaizuen arrazoirik falta izan. Hotzak egon zinetenok ere datorren XXXI. Sakanako Ibilaldian Irurtzunen nahi zaituztegu.

Ibilbide Luzeko partaideentzat oharra

Hilabete honen hasieran berri txar bat jaso genuen XXX. Sakanako Ibilaldiaren antolatzaileok: Felix Isasa oso gaixorik zegoela eta, egun gutxira, hil zela. Ezaguna denez, Isasa izan zen Euskal Herriko Erdigune Geografikoa Andiako Mendizerrako puntu batean proposatu zuena. 2004a zen. Hurrengo urtetik aurrera Sakanako Ibilaldia Euskal Herriko Erdigunetik pasatzen hasi zen eta XXX. urteurrenean ere bertatik pasatuko da.
Hori dela eta, antolatzaileok eskaera xume bat luzatu nahi dizuegu Ibilbide Luzea egingo duzuen mendizaleei: Euskal Herriko Erdigunean zaudetenean, agurtu ezazue Felix Isasa, hantxe izango baita, ziur, hainbeste maite zuen puntu ezagun eta enblematiko hori zaintzen. Egun on, Felix, eta eskerrik asko!