IZAGAKO EGOERA

HOTZA!! Aspaldian pasatu dugun handiena, han, tontorrean, 1360metrora, urtarrilaren 22an. Haize zakarra eta oso oso hotza, ikaragarri. Hozka egiten zuen!! Eta hori, Monreal inguruan, batek ez zebilela batere haizerik esan, pozik. Argazkirik ere ez genuen atera! Gailurrera iritsi eta, korrika, S. Migel ermitaraino jaitsi behar izan genuen pareten babesaren bila. Pena, bai, baina ez zegoen tontorrean agoantatzerik Pirinioak zuri-zuri eta hurbil ikusten ziren arren. Argazkiak beste baterako utzi genituen.

Tontorrean ez zen elur handirik, egia. Han jotzen duen haizearekin… Hala ere, bidean geruza ederra zegoen eta  zenbait tokitan ezpelak eta beste zuhaixka batzuk elurraren zamak ederki beheratuak zituen eta azpitik pasatzeko ongi makurtu beharra zegoen. Eta batzuen gerri gogorrentzat… Goiz ibiltzearen ondorioak.

Iristean, lehenak izan ginen Ardanazko aparkalekuan hiru kotxeak uzten. Oinak elur gainean jarri orduko, zalantza: polainak beharrezkoak ote dira? Batzuek  zangoak babestu egin genituen, badaezpada, baina ez ziren beharrezkoak elurra izoztuta zegoelako. Bidean elurra eta izotza kristala bezala, tarteka. “Jaitsieran kontuz ibili behar!” Hala ere, ipurdiko batzuk hartu genituen.

Hamaiketakoa ermitaren ormen babesean egin genuen, presaka. Han ere ez zen giro! “Begira, botilako ura izoztuta dago!” ohartu zen neska bat.

Gu behera, kontu handiz,  eta jende mordoa, gora. Gu baino lasaiago egonak ziren ohatzean. Aparkalekura iristean, dena beteta.

Hiru kotxeetan sartu ginen hamalau mendizaleak eta Artaitzeko eliza erromaniko ederraren munstroei begira egon ginen zer sinbolizatzen ote zuten asmatu ezinik. Ezer onik ez behintzat.

2023-01-22 PEÑA IZAGA

Hurrengo irteera: PEÑA IZAGA

EGUNA: 2023-01-22

ORDUA: 08:15

NONDIG: IRATXOTIK

TRINITATEA 2022-12-31

HITZALDIAK ETA MUS TXAPELKETA IRATXON EGUBERRI AURRETIK

“Merkatu elektrikoari buruzko hitzaldia eta fakturak ulertzeko tailerra” Goiener kooperatibako kide batek eskaini zuen, abenduaren  13an, gazteleraz. 30 inguru bazkide eta kanpoko lagun bildu ziren ekintzan eta gaiaren inguruko informazio zabala jasotzeaz gain, faktura elektrikoaren inguruko zalantza ugari argitu ziren. Ordu eta erdi luzez egon zen jendea hizlariaren azalpenak entzuten eta galderak luzatzen. Etxetik eramandako fakturen inguruko zalantzak ere argitu ziren. Hori bai, entzule eta parte hartzaile gehienak pertsona helduak izan ziren. Irudi luke gazteek ez dutela elektrizitaterik kontsumitzen.

Hilaren 15ean bigarren  hitzaldia izan zen  Iratxon, : “Ekonomiaz hizketan” bertako bazkide gazte batek, Julen Iragik, eskainia. Gaiak erakarrita, entzule mordoa bildu zen hitzaldi honetan ere, baina oraingoan gazteak izan ziren gehienak. Interesgarria izan zen ekonomiaz esana eta, agian, beste batean, gaian sakontzeko bigarren hitzaldi bat prestatzeko eskatu behar Juleni.

Eskerrik asko bi hizlariei.

Larunbatean, berriz, 17an, arratsaldeko 5etan hasita Mus txapelketa azkarra izan zen elkartean. 12ren bat bikote lehiatu ziren eta ondorengo lau hauek izan ziren irabazleak:

  1. saria: Eduardo Murugarren – Miel Ollo
  2. saria: Patxi Alegre – Jose Julian Matxain
  3. saria: Ritxard –Peio Mtnez de Eulate
  4. saria: Tirillas – Bisbi

Saridunek pozik bukatu zuten. Zorionak! Gainera, arratsaldea girotzeko eta Iratxora jendea erakartzeko ekintza interesgarria izan zen. Partxis txapelketa eskean ari da zenbait jende, emakumeak bereziki. Ea antolatzaileek  kasurik egiten dieten.

Ez ahaztu urtarrilerako ekintza gehiago prestatu ditu Kultur Batzordeak. Beraz, erne eta animatu parte hartzera.

SUTE ARRISKUAK TXIKIAGIOAK TRINITATEKO ERMITAUAREN ETXEAN

Trinitatean azken hilabeteetan izan bazarete, ohartuko zineten aterpeko atean zein barnean ere surik ez egiteko eskatzen zuen kartelak jarriak zeudela. Arrazoia suaren zurezko buruko bat erretzen ari zela eta sute bat eragiteko arriskua zegoela zen. Begira nola zegoen!  Surik ez egiteko eskatzeko pisuzko arrazoiak!

 

Azken egun hauetan, Iratxo Mendi Taldeak Irurtzungo eta inguruko herrietako beste batzuen laguntzaz, suari burdinazko (erregaitza, beraz) burokoa jarri dio eta egoera erabat aldatu da: sute arriskua nabarmen txikitu da. Kontuz! Horrek ez du esan nahi arriskua guztiz saihestu denik, guztiok baitakigu suak erre egiten duela. Orain aterpeko beheko sua honela dago.

Dotore eta segurua!

Ikus daitekeenez, zura kendu zaio eta burdinazko burukoa du orain su bajuak; seguruagoa da , beraz. Berotu nahi duzuen mendizaleok, aurrerantzean sua pizteko aukera duzue. Surik ez pizteko zioten kartelak soberan daude.

Hori bai! Gogoratu sua piztekotan egurra bildu beharko duzuela eta sua barruan egin. Zurezko burukoa sua kanpoegi egiteagatik ari zen erretzen.

Beheko su berritua ikustea izan daiteke orain Trinitatera igotzeko beste arrazoi bat.

Jakin badakigu orain bezain ongi eta txukun erabiliko dugula aterpe goxoa eskaintzen digun txoko polit hau.

Eskerrik asko mendizale Trinitatezale guztioi  Iratxoko Mendi taldearen izenean. Ongi etorri!