XXXI. SAKANAKO IBILALDIA, 2022AN

Behin betiko, ez. Aurten ez du Iratxo Mendi Taldeak XXXI. Sakanako Ibilaldia antolatuko. Horrela erabaki du taldek, aurretik pentsatu bezala, uztailaren bukaeran eginiko bileran. Pandemiak eragindako egoera ez egonkor eta aldakor honetan ez dugu bideragarri ikusten horrelako ibilaldi garrantzitsua antolatzea. Beraz, 2022an izango da XXXI. Sakanako Ibilaldia. Bi urteko atzerapenarekin iritsiko da.

Gure ibilaldiaz mendizaleekin harremanetan izan ginen azkenekoan, 2021eko apirilaren 24an, hitzez hitz, honela jakinarazten genizuen Iratxo Mendi Taldearen asmoa: “XXXI. Sakanako Ibilaldia aurten egitea gustatuko litzaiguke. Ahalegin guztiak egingo ditugu horretarako eta, egoera sanitarioak aukerarik ematen badu, uda bukaeran egin nahi genuke XXXI. ekitaldia”. Bada, ez dugu ikusten egungo egoerak horrelako proiektu batean sartzeko lasaitasunik nahiz ziurtasunik eskaintzen duenik. Ez gara hemen eta orain etsitzeko eta azken ahalegina bertan behera uzteko izan ditugun arrazoien berri ematen hasiko, baina badakigu Iratxo Mendi Taldearen erabakia ulertuko duzuela. Esan bakarrik argi ikusi dugula, hala ere,  galtzeko irabazteko baino gehiago zegoela, kalteak onurak baino handiagoak izango liratekeela eta, bizi garen baldintza hauetan, ez duela merezi hainbeste lagun eta kolaboratzaileren inplikazioa eskatzen duen ibilaldia antolatzeko ahalegin handia  egitea. Indarrak 2022rako gordeko ditugu, beraz, eta beti bezala, apirilaren azken larunbatean egingo dugu Sakanako Ibilaldia.

Honenbestez, datorren urteko Ibilaldia prestatzen hasiko gara laster, orain arteko bikainena izango den itxaropenean. Informatuta edukiko zaitugu, mendizale.

APIRILAREN 24a, XXXI. SAKANAKO IBILALDIA

Iratxo Mendi Taldekook badakigu egun hau zure egutegian  gorriz markatua izango zenuela eta larunbatean elkar ikusi eta agurtuko genuelako  itxaropena izango. Ezinezkoa da, ordea, pandemia madarikatu honen ondorioz. Bigarrenez eragotzi digu XXXI. Sakanako Ibilaldia ospatzea. Gogorra, gaixotasuna!!

Baina Iratxo Mendi Taldekoak ez gara erraz etsitzen duten horietakoak. Saiatu gabe ez, behintzat. Eta oraingoan ere aurrera egiteko asmoa dugu: XXXI. ekitaldia aurten egitea gustatuko litzaiguke. Ahalegin guztiak egingo ditugu horretarako eta, egoera sanitarioak aukerarik ematen badu, uda bukaeran egin nahi genuke XXXI Sakanako Ibilaldia. Noiz eta nola? Aurrerago erabaki behar dugu. Baina egon ziur gure aldetik ahal den guztia egiteko prest gaudela.

Beraz, mendizale, egon erne eta gure informazioen zain. Eta Ibilaldia antolatuko bagenu, etorri Irurtzuna, mesedez, mendian gozatu egun handi bat pasatzera.   Eskerrik asko

XXXI. SAKANAKO IBILALDIA

XXXI. SAKANAKO IBILALDIA  ez da 2021eko ohiko apirilaren azken larunbatean egingo. Iratxo Mendi Taldeak Ibilaldiaren inguruko erabakia orain arte atzeratu du itxaropena ez baikenuen erabat galdu nahi. Baina,  gizarteak pandemiaren ondorioz bizi duen egoerak bultzatuta eta guztion onerako, apirilean antolatzeko aukera behin betiko baztertzea beste erremediorik ez zaigu geratu.

Hainbat mendizale Sakanako Ibilaldiari buruzko informazio bila zuzendu zaizkigu ia prestatzen hasiak zirela jakinaraziz. Eskerrak ematen dizkiegu, bihotzez, lagun zintzo guztiei eta    XXXI. SAKANAKO IBILALDIA egin egingo dela ziurtatu. Momentuz, ez dugu aurten, 2021 honetan bertan, antolatzerik baztertu, baina erabakiak hartzeko Covid 19aren bilakaera aintzat hartuko dugu.

Beraz, oraingoz, ezin dugu berri gehiagorik eskaini eta bai antolatzaileok bai zuek, mendizale lagunak, gerta daitekeenaren zain geratuko garaInformazioa sortu ahala emanen dizuegu.

Mila esker Iratxo Mendi Taldearen izenean eta itxaropena ez galdu.

Irurtzunen, 2021eko otsailaren 6an

IRATXO MENDI TALDEA

25eko IBILALDI BIRTUALA

Kaixo, mendizale hori:
Gaur 25 da, bai, gure Sakanako Ibilaldiaren larunbata eta, garai honetan, abian izan beharko genuke, irteerako urduritasun ohikoarekin, Pabloren suziriaren zain S. Donato, S. Miguel, Trinitatea eta Itxasperriko Santiago baselizetarantz joateko; nahiz igarotzen ditugun beste gune esanguratsu batzuetarantz: Euskal Herriko Erdigunea, Agiri herri hila, Larrazpileko trikuharria; edo deika ariko zaizkigun tontorrak nahiz, urtero bezala, zain izango genituzkeen inguru hauetako herriak.
Errealitatea bestelakoa da, ordea: etxean egotea behartzen gaituen zientzia-fikziozko film bateko egoera guztiz surrealista ari gara bizitzen. Hainbat eta hainbat bizi aurrean hartuta eraman dituen Covid-19aren uholdeak gure bizitzaren zati bat “ebatsi” digu: gure mendiez gozatu ahal izatea, geure Ibilaldiaz; baina ezin digu “lapurtu” ez irudimena ezta maite dugunaz gozatzeko ilusioa . Hortaz, Ibilaldia birtualki egitea proposatzen dizugu eskaintzen dizkizugun esteka batzuen bidez. Hasteko, XXX. Sakanako Ibilaldiaren urteurrenaren bideoa (20 minutu irudi ikusgarriz josiak)ikusiz egin dezakezu ibilbidea: https://youtu.be/SudoJIcy3-E
Edo, denboraz larri bazabiltza, 2017 beste bideo laburrago honetara jo dezakezu: https://youtu.be/2hnI3AZVZcw
ETBko Gailurra Martxan saioak egindako erreportajea ere ikus dezakezu hurrengo estekan: https://youtu.be/4wTZNvYY64Y
Edo Iratxo Elkarteko web orrian argazki mordo bat ikusi: https://www.iratxoelkartea.com/multimedia/fotos/sakanako-ibilaldia/
Imajinazioa erabili eta, ariketa egiten ari zarela nahiz balkoian edo sofan eserita, amets egin, irudikatu lagunekin ibilian zabiltzala Ibilaldiak zeharkatzen dituen tokietan barrena: Andia, Aralar, Larrazpil, Erga… Aprobetxatu kontroletatik edo hornidura puntuetatik igarotzean indarrak berreskuratzeko eta azken urteetan zehar ezagutu dituzun boluntarioak agurtzeko. Eta eguna merezi duen bezala amaitzeko, gozatu enparantzan txixtorra pintxoak eta sagardo fresko goxoa ibilaldiaren gorabeherak komentatzen eta goratzen dituzuela: ibilaldia bukatzeagatiko poztasuna edo halako urtetan bukatu ezin izan zenuela… dena delakoagatik.
Laburtuz, utzi irudimenari hegan egiten eta pentsatu 2021ean berriro gogo gehiagoz ikusiko dugula elkar.
Gora gu eta Sakanako Ibilaldia!!!

XXXI. SAKANAKO IBILALDIA BERTAN BEHERA

Gizarteak bizi duen Covid-19 pandemia dela eta, osasun-agintarien gomendioei jarraituz eta mendizaleen, zein laguntzaile, antolatzaile nahiz herritar guztien osasuna lehenetsiz, Irurtzungo Iratxo Elkarteak apirilaren 25en egitekoa zen XXXI. Sakanako Ibilaldia bertan behera uztea erabaki du. Beraz, aurten ez da egingo Ibilaldia ez ezarritako datan ezta beste batean ere.
Hori bai; 2021eko apirilaren azken astean berriro gurekin izango da XXXI. SAKANAKO IBILALDIA.
Lerro hauen bidez, gainera, aurten zein aurreko urteetan ibilaldi hau ahlbidetu duten, erakunde, komunikabide, enpresa, mendizale eta laguntzaile eta boluntario guztiei Iratxo Elkartearen esker ona adierazi nahi diegu. Eskarrik asko.
Eta nola ez, 2021en indar gehiagorekin ekingo diogu lanari!