04 Sep, 24
Iratxo Elkartea Mendi Berriak

PIRINIOTAKO TXANGOARI AGURRA

Eskerrak berriz ere Iratxoren proposamenari eman diozuen erantzunagatik eta asteburua hain ongi joan zedin lagundu duzuelako.

Asteburuan sortutako giroa ezin hobea izan da, eguraldia (agindu bezala) bikain portatu da eta dena ongi joan denez, gustura itzuli gara (pena gertatu diren bi istripu txikiak).

Talde zabal eta anitza osatu genuen, adin oso desberdineko jendea ginen eta hori oso aberatsa da. Hala ere, esan ez zela gazte gehiegi animatu. Ia hurrengoan…

Polittena, ia denok pozik hartu genuela autobusa Irurtzunera itzultzeko. Giroak hori erakusten zuen behintzat. Bazen La Besurtan eta Vado de L’Espitalen euforia moduko zerbait. Norberak jakingo du zer helburu zituen jarriak mendi mailan, baina egin eta lortutakoarekin oso gustura utzi genuen Posset-Maladeta parke naturala. Ezin esan inork gutxi egin zuenik: bakoitzak jakin izan zuen noraino hel zitekeen eta helburua lortu zuen. Beraz, mendiko bidea hartu genuen guztiok merezi dugu txalo zaparrada. ZORIONAK GUZTIOI!!

Eskerrik beroenak eta ia beste batez antzeko batean elkar ikusten dugun.

OHARRA: Argazki “muntaia bat” egiteko asmoa dugu. Prestatuta dagoenean abisatuko dugu.

26 Aug, 24
Iratxo Elkartea Mendi Berriak

MIDI D’OSSAUko ITZULIA – IRAILAK 14

Pikuxar elkartearekin batera prestatutako irteera da. Kartelean adierazten den ibilbideaz gain, zonalde berean beste bat ere egin ahal izango da, laburragoa eta errazagoa.

IRTEERA: 7:00etan autobus geltokitik.

Itzulera ordua: 20:30ak inguruan.

PREZIOA: Bazkide eta Mecnakideak 10 € (Iratxo eta Pikuxar).

Bazkide ez direnak: 15 €.

IZEN EMATEA: Abuztuaren 30etik irailaren 11ra (biak barne) Pikuxarreko tabernan.

Informazio gehiago: Santi: 627400507 eta Gorka: 628366943.

21 Aug, 24
Iratxo Elkartea Sin categorizar

BENASQUEKO PROGRAMA DE BENASQUE

Irurtzundik Benasquerako bidaiak lau bat ordu iraungo du. Beraz,  larunbata aprobetxatzeko, goiz abiatzea komeni da, Llanos del Hospitalera 11:30ak aldera iritsi eta lauzpabost ordu izateko lekua ezagutzeko. Hona bi egunetako programa.

1.- Abuztuaren 31, larunbata

7:30:      Irurtzungo autobus geltokitik abiatzea.

9:30:      Geldiketa teknikoa (30 minutu) Boltañan: komunak, kafetxoa…

12:00: Llanos del Hospital (Aneto-Maladeta parke naturala).

 Hemen hasiko da egitaraua bikoizten. 

12:15: A AUKERA – GORGUTES IBONA

Zailtasun ertaineko ibilaldia, 600 metro inguruko desnibelarekin, ibones de la Solana (2220m) eta Gorgutes ibonaz (2320m) gozatzeko eta Frantziako mugara iristeko aukera ematen duena. Ur-jauzi txikiak eta Aneto eta Maladeten bista zoragarriak. Lau ordu inguru pauso lasaian                        

 A AUKERA –    VILLAMORTA IBONAK  

Ibilaldi erraza eta desnibel gutxikoa Villamorta ibonetara. Ikuspegi ederrak eskaintzen ditu, Aneto eta Maladeten lehen mailako panoramekin gozatzeko.

 17: 00:  Guztientzat 

Vado de l’Eespitalen autobusa hartu hotelean gelak banatzeko.

19:30:    Benasque ezagutzeko aukera.

21:00:   Afaria hotelean.

2.- Irailaren 1a, igandea.

  A AUKERA  –  TUC DE MULLERESERAKO IGOERA.                                                    

 6:30: Gosaria hotelean.

7:30:     Autobusa Vado de l’Espitelera .

8:00:     Autobusa hartu la Besurtara ailegatzeko.

8:30:     Tuc de Mulleresera abiatzea.

3.000 metroko gailur erraza. Igoera luzea, baina zailtasunik gabea. Hori bai, kontuz ibiltzeko igoera.  El Forau de Aigualluts eta hainbat paraje eder zeharkatuko ditugu: errekak, ibonak…

5:30:  (Beranduenik  La Besurtan autobusa hartu behar dugu Vado de l’Espitalen bukatzeko. Han izango dugu zain Mugiroarra.

   B AUKERA  –    LA BESURTA – IBÓN DEL TORO                                                        

8: 00:    Gosaria hotelean.

9:00:     Autobusa Vado de l’Espitelera.

9:30:     Autobusa hartu la Besurtara ailegatzeko.

10:00:    Ibilaldiari ekingo diogu.

Aigualluts ezagutu eta gozatuko dugu: Forau delakoa, ur-jauzia eta Aiguallutseko zelaia (Mulleresko igoeraren ibilbide bera). Toroko lepora desbideratu eta izen bereko lakura iritsiko gara bukatzeko, bi ordu inguruko ibilaldian, zailtasunik gabe.

5:30(Beranduenik)  La Besurtan autobusa hartu behar dugu vado de l’espitalen bukatzeko. Han izango dugu zain Mugiroarra.

AUKERAK DESKRIBATZEN 
 LARUNBATA  –  VILLAMORTA IBONAK

  Vado de l’Espitaleko aparkalekutik abiatu, eta, hotelaren ezkerraldetik, belardi eta zuhaizti guneetatik jarraituko dugu. Benasqueko Portillonera doan bidegurutzea utzi, eta Besurtarantz jarraituko dugu, eskuineko adarretik. Bidezidorrak aurrera egiten du zelaien eta pinu beltzen artean. Artzainen aterpe txiki baten ondotik igaroko gara. Kartelek Besurtara eramaten gaituzte (txiringitoa eta estalpea). Renclusarako bidea utzi, eta, ibaia zeharkatu bezain laster, ezkerreko bidexka hartuko dugu komunaren atzetik. Minutu gutxiren buruan Villamorta baxura iritsiko gara (1.957m). Hain zehaztuta ez dagoen bidexka batetik Villamorta garaira (2.069m) iritsiko gara, eta bide beretik itzuliko gara argazki saioaren ostean.

 GORGUTES IBONA

Vado de l’espitaletik abiatuko gara hotelaren ia parean Gorgutes errektxoaren eskuin aldetik igotzen hasteko, lehenengo ur-jauzia aurrean dugula. Basoan sartzean bidexka aurkituko dugu eta berari jarraitzea besterik ez dago. Bigarren ur-jauzira iristean, erreka zurezko zubi batetik gurutzatuko dugu (2.000m). Goraxeago, eskuinera hartuta Ibones de la Soranara iritsiko gara eta hauek ikusitakoan atzera egingo dugu Gorgutes ibonerako bidea berrartzeko. Ibonera heldutakoan Frantzia eta Espainaren arteko mugaraino hurbil gaitezke vado de l’espitalera itzuli aurretik. Jaitsiera bide beretik egingo dugu.

 IGANDEA  // DOMINGO –  TUC DE MULLERES

3.000 metroko gailur erraza. Igoera luzea, baina zailtasunik gabea. Hori bai, kontuz ibiltzekoa.  La Besurtatik (1900m) abiatuta, Aigualluts paraje zoragarri bezain berezia zeharkatutakoan, Escaletako haranean gora egingo dugu, aurrean la Forcanadaren  tontor bikoitza gidari. Kartel batean Mullereserako norabidea ikusiko dugu. Harana itxi egiten da eta,  errekaren ibilgua/zuloa utzita, eskuineko harkaitzaren gainean harri-mutilek erakusten digute bidea (hau da bidearen zatirik nahasgarriena eta kontuz ibiltzekoa). Resalte hori gaindituta, errekaren ondoan egingo dugu aurrera lehenengo ibon txikira iristeko. Aurreraxeago Escaletako  ibonak (2336m) topatuko ditugu eta harkaitzean gora egingo dugu harri-mutilak segituz  lepoko ibon txikira  (2460m) iritsi arte. Erreka gurutzatuta aldapa gogorra dugu aurrean.  Eskaletako goiko ibona (2639m) dugu orain zelaitxo batean eta hortik aurrera tontorrera bideratuko gara harri artean (3.009m). Litekeena da elurtegiren bat izatea.

 Paisaia, zoragarria: Aneto-Maladetas tontorrak, Besiberriak, ibonak nonahi. Gozatuaren ondoren, bide beretik  jaisteen hasteko garaia da. 

 LA BESURTA – IBÓN DEL TORO

Bidean hasi eta azkar la Renclusarako gurutzea utziko dugu ezkerretik aurrera egiteko. Forau de Aigualluts (erreka desagertzen den zuloa) eta Aiguallutseko  ur-jauzian argazki saioa eginda, Plan de Aigualluts zelai ederra zeharkatu behar da  “Coll de Toro 40’ ” seinalea topatzeko. Ezkerreko sakanean sartuta, metro batzuk igo behar dira (bidea ongi presatuta dago). Bigarren zelai baten  bukaeran bigarren seinalea ikusiko dugu

Gure markari jarraituta (ezkerrera) Del Toro lepora iritsiko gara eta, pixka bat jaitsita, Del Toro ibona (2222m) izango dugu gure bigarren argazki saiorako eszenatoki bikain. Zerbait lasai pikatuta itzulerari helduko diogu bide beretik.

 

 

22 Jul, 24
Iratxo Elkartea Mendi Berriak

2024ko TXANGOA PIRINIOTARA IRATXOREKIN

HUESKARA JOKO DUGU AURTEN BENASQUE ETA POSET-MALADETA  PARKE NATURALERA

Benasque herri ederra eta Piriniotako erdigunea bera ezagutuko ditugu Poset-Maladeta parke naturalean bi egun ahaztezin pasatuz. 3.000 metroko tontorrez inguratuta biziko ditugu larunbata eta igandea eta bertako txoko paregabeak gozatzeaz gain, paseo errazaz emanez gozatzeak gain, Tuc de Mulleres (3.009 m) igotzeko aukera ere izango dugu.

IRTEERA IRURTZUNDIK EGINGO DA ABUZTUAK 31 LARUNBATEAN ETA ITZULERA IGANDEAN, ARRATSALDE-GAUEZ.
31KO GAUA  BENASQUE HERRI PAREGABEAN PASATUKO DUGU, AFARI ETA GOSARIAREKIN
APUNTATZEKO AZKEN EGUNA: UZTAILAK 28, IGANDEA. PLAZA MUGATUAK: 55.
GUTXI GORABEHERA PREZIOA: 90/100€

Gogoan izan zailtasun desberdineko txangoak egiten ditugula beti joaten diren pertsonentzat egokituak: Paseoak herrian eta inguruan, iraupen desberdineko ibilaldiak eta Tuc de Mulleresera igotzea.

Anima zaitez eta anima itzazu zeure lagunak!! primeran pasatuko dugu!!!!!

A! ETA AURTEN EGURALDI BIKAINA IZANGO DUGU.

24 Jun, 24
Iratxo Elkartea Ibilaldia berriak

AFARI SOLIDARIOA PALESTINAREKIN

UNRWAren Nafarroako ordezkariari 8.5000 euroko txekea eskuratuz eman zion amaiera Iratxo Mendi Taldeak XXXIII. Sakanako Ibilaldiari.

Jai-amaiera giroan bukatu nahi zenez 2024ko edizioa, mahaiaren inguruan bildu ginen 75 inguru lagun joan zen ostiralean. Uharteko Mirenen gidaritzapean prestatutako marokoar kutsuko afari bikaina mahairatu zen: kuskusa, oilasko errea, emakume marokoar batek egindako pasta goxoak eta, bukatzeko, te beltza. Dena bikaina, mahaikideek adierazi zutenez.

Jangela Palestinako banderaz eta UNRWAko salmenta postuaren alboetan jarritako panel eta argazkiz apaindua. Dotore.

Hori bai, “ukitu lokala” eman nahian, mundu musulman/arabiarrararekin inolako zerikusirik ez duten osagaiak ez ziren faltatu: Palacios enpresak Ibilaldirako emandako eta soberan geratutako txorizoak (aprobetxatu beharrekoak) sagardotan  egosiak eta sagardoa eta ardoa.

Afal ondoren, mahaikideok erne demontre jarri gintuen zozketa bikaina. Izan ere, Ibilaldian jaso gabe beratu ziren bost opari bikain zozketatzea erabaki zuten Iratxo Mendikoek. Hona opariak: Oreka Fisioterapiako masaje saio bat,  Bi Sisters Burger-ek eskainitako hiru bazkari/afari bikoitz eta Kubo jatetxearen bazkari bikoitza. Ideia bikaina zozketarena. Euro bateko 1.650 txartel saldu ziren eta kopuru hori gehitu zitzaion UNRWUAri egindako eskaintzari. Kopuru polita! Gainera, afarian 1.150 € garbi lortu ziren.

Zozketaren emaitzak zuzenen ikusi ahal izan genituen telebistan zenbakiak ausaz, aleatorioki, agertzen zituen programari esker. Sari batzuk bertan banatu ziren argazkiak eginez.

Ekitaldiko momenturik garrantzitsu eta esanguratsuenak eman zion amaiera afariari. Izan ere, Iratxo Mendi Taldeko kideek (Ibilaldiko kamiseta jantzita talde ederra osatzen zuten) UNRWAKO ordezkariari, Javier Moreno 8.500 €ko txeke ederra eskuratu zioten hilabete luzetako genozidioa eta neurrigabeko sufrimendua pairatzen ari diren palestinarren bizitzak zertxobait hobetzen laguntzeko.

Berandutu egin zen arren, uraren inguruko escape room joku didaktikoa ere egin zen goiko gelan eta gaua nahiko luzatu zen

Eta bukatzeko, eskerrak bihotzez, XXXIII. SAKANAKO IBILADIAn parte hartu zuten mendizale nahiz laguntzaile guztiei baita ostiralen afaltzen izan zinetenoi ere. Ahalegina luzea eta gogorra izan da, baina merezi izan du. Benetan!

Eta ea 2025erako zer asmatzen duten Iratxo Mendi Taldekoek. Ikusi egin behar.

1 2 3